Book description

Mazkur o‘quv-uslubiy qo‘llanma “Yallig‘lanishga qarshi vositalar” mavzusini chuqur o‘rganishga bag‘ishlangan bo‘lib, tibbiyot oliy ta’lim muassasalari talabalari uchun farmakologiya fanidan nazariy va amaliy bilimlarni tizimli ravishda shakllantirish maqsadida ishlab chiqilgan.
Qo‘llanmada yallig‘lanish jarayonining rivojlanish mexanizmlari, uning biologik ahamiyati, mediatorlari hamda organizmda kechadigan patofiziologik o‘zgarishlar zamonaviy ilmiy qarashlar asosida yoritilgan. Shuningdek, yallig‘lanishga qarshi dori vositalarining tasnifi, farmakodinamikasi, farmakokinetikasi, qo‘llash ko‘rsatmalari, qarshi ko‘rsatmalari, nojo‘ya ta’sirlari va dori vositalari o‘rtasidagi o‘zaro ta’siri batafsil bayon etilgan.
Qo‘llanmada steroid bo‘lmagan yallig‘lanishga qarshi preparatlar, glyukokortikosteroidlar, bazis yallig‘lanishga qarshi preparatlar hamda zamonaviy biologik preparatlarning farmakologik xususiyatlari alohida boblarda izchil yoritilgan. Har bir preparat guruhi bo‘yicha klinik qo‘llanilish xususiyatlari, afzalliklari, cheklovlari va farmakoterapiyada tutgan o‘rni ilmiy asoslangan holda tavsiflangan.
Talabalarning nazariy bilimlarini mustahkamlash va amaliy ko‘nikmalarini rivojlantirish maqsadida qo‘llanmaga retsept namunalari, vaziyatli masalalar, nazorat savollari, test topshiriqlari hamda zamonaviy interfaol ta’lim usullari kiritilgan. Ushbu materiallar talabalarda klinik fikrlashni rivojlantirish, dori vositalarini oqilona tanlash va farmakoterapiya tamoyillarini puxta o‘zlashtirishga xizmat qiladi.
O‘quv-uslubiy qo‘llanma farmakologiya fanini o‘qitishda kredit-modul tizimi talablariga mos ravishda tayyorlangan bo‘lib, tibbiyot oliy ta’lim muassasalari talabalari, magistrlar, klinik ordinatorlar hamda farmakologiya va klinik fanlardan dars beruvchi professor-o‘qituvchilar uchun foydali o‘quv manbasi hisoblanadi.